(བཀྲས་མཐོང་བསྟན་འཛིན་རྣམ་རྒྱལ་ལགས་ཀྱིས་ཀ་ལོན་སྦུག་གི་བོད་མི་ཚོར་བཀའ་སློབ་གནང་བཞིན་པ་)བཀྲས་མཐོང་བསྟན་འཛིན་རྣམ་རྒྱལ་ལགས་སུ་ཀ་ལོན་སྦུག་ན་རྒྱབ་སྐྱོར་ཤུགས་ཆེ་བྱེད་མཁན་ཡོད་པས་དགའ་སྤོབས་དང་། སྐལ་བཟང་ལགས་མི་ལོ་ཧྲིལ་པོ་བཞི་བཅུ་ལྷག་འཚར་ལོངས་བྱུང་སའི་ལུང་པ་དང་བྲལ་ནས་ཐེངས་དང་པོ་སླེབས་ཐུབ་པ་དེ་ནི་ཁོང་ལ་ཆ་བཞག་ན་མི་ཚེའི་ནང་བརྗེད་པར་དཀའ་བའི་དྲན་གསོའི་དེབ་ཆུང་བཀླགས་པ་ལྟར་མྱོང་ཚོར་ཟབ་མོ་བྱུང་སོང་། ང་ཚོ་ཀ་ལོན་སྦུག་ཏུ་ཡོད་པའི་མགྲོན་ཁང་རྙིང་ཤོས་དང་ལོ་རྒྱུས་ཡུན་རིང་ལྡན་པའི་མགོན་པོ་གསོལ་མགྲོན་ཁང་དུ་བསྡད་པ་ཡིན། གསོལ་མགྲོན་ཁང་དེ་ནི་བསོད་ནམས་ལགས་ཀྱི་ཡིན། ཁོང་ནི་༧སྐྱབས་མགོན་རིན་པོ་ཆེ་སྐུ་ཕྲེང་བཅུ་གསུམ་པ་མཆོག་རྒྱ་གར་དུ་༡༩༠༠ ནང་ཕེབས་པའི་སྐབས་ཀྱི་སྐུ་བཅར་བ་ཞིག་གི་ཚ་བོ་ཡིན་། ཁོང་གི་ཨ་ཁུ་ལགས་ཀྱིས་དེ་སྔོན་བརྩམས་གནང་བའི་བོད་ཧིན་ཤན་སྦྱར་གྱི་ཚིག་མཛོད་དེ། བསོད་ནམས་ལགས་ཀྱི་དཀའ་སྤྱད་ཁུར་དུ་བཞེས་ནས་ཉར་ཚགས་ལེགས་པོ་བྱས་པའི་གྲུབ་འབྲས་ཤིག་ཡིན། ཁོང་གི་ཨ་ཁུ་ལགས་ཀྱི་གནས་ཚུལ་མང་པོ་ཞིག་ཨ་མྱེས་རྨ་ཆེན་བོད་ཀྱི་རིག་གཞུང་བསྟི་གནས་ཁང་གི་འགན་འཛིན་མཁས་དབང་བཀྲིས་ཚེ་རིང་ལགས་ནས་ཤེས་རྟོགས་བྱུང་ཡོད། པར་རིས་ཀྱི་དབུས་སུ་བཞུགས་པ་ནི་མགོན་པོ་གསོལ་མགྲོན་ཁང་གི་བསོད་ནམས་ལགས་ཡིན།
༧སྐྱབས་མགོན་རིན་པོ་ཆེ་སྐུ་ཕྲེང་བཅུ་གསུམ་གྱི་སྐུ་བཅར་གྱི་ཚ་བོས་ང་ཚོ་ཞོགས་ཟས་མཆོད་དུ་འབོད་གནང་སྟེ། ནང་མིའི་ལོ་རྒྱུས་དེ་རྣམས་གསུངས་གནང་སོང་བས་རེ་ཞིག་སྣང་བ་སྐྱིད་པོའི་ཞོགས་ཟས་དེ་ལོ་རྒྱུས་ཀྱི་སློབ་ཁྲིད་ཞིག་ཆགས་སོང་།
